Очекувани победи на Франција и Шведска

Во средбите од 3-то коло на Групата 1 од вториот круг од Европското ракометно првенство во понеделникот во Загреб ракометарите на Франција и Шведска постигнаа очекувани победи против Србија, односно Белорусија и се чини дека „триколорите“ веќе го осигурија настапот во полуфиналето.

Шведска ја победи Белорусија со 29:20 (16:11) рутински одработувајќи го она што се очекуваше. Кај Швеѓаните најефикасни беа Хампус Ване и Албин Лагергрен со по 4 голови, додека кај Белорусија предничеа Уладзисалу Кулеп и Арстем Каралек, кои исто така постигнаа по 4 погодоци.

Претходно Франција убедливо ја совлада Србија со 39:30 (19:12). Србија, којашто веќе во 2-та минута остана без исклучениот ракометар на скопски Вардар, Мијајло Марсениќ, откако судиите ја прегледуваа снимката од неговиот старт врз Мае, држеше приклучок до 20-та минута прво полувреме, а тогаш падна и Французите заминаа на полувреме со седум голови предност 19:12. Во продолжението светските шампиони рутински го приведоа мечот до крајот.

Кај Франција најдобри стрелци беа Лука Карабатиќ, кој главно игра на овој турнир во одбраната, и Рафаел Кошето, кој ретко добива шанса да заигра, со по 7 голови. Кај Србија Немања Зеленовиќ постигна 7, а Петар Ненадиќ 6 голови.

Пред последното коло Франција има максимални 8 бодови и победи против Норвешка (32:31) и Шведска (23:17), и практично осигури пласман во полуфиналето. Во среда Франција игра против Хрватска, а единствена можност Франција да биде во круг со уште две репрезентации со ист број бодов е да биде со Шведска и Хрватска, но тогаш Французите би морале да загубат од Хрватите со девет или повеќе голови разлика.

Хрватска и Шведска имаат по 6 бодови, но Швеѓаните имаат и победа врз Хрватите со 35:31. Норвешка има 4 бодови, а Србија и Белорусија се без бодови.

Во последното коло во среда прво играат Србија – Белорусија, Шведска – Норвешка и Хрватска – Франција.

Двете првопласирани репрезентации од групата ќе изборат настап во полуфиналето, кое ќе се игра во петок.

Доколку преземете содржина од оваа страница, во целост сте се согласиле со нејзините Услови за користење.