Од Македонија во Косово со биометриски лични карти

Од Македонија во Косово со биометриски лични карти
Од Македонија во Косово со биометриски лични карти
Граѓаните на Македонија и Косово наскоро ќе можат да ја поминуваат државната граница со биометриски лични карти за краток престој во соседната држава.

Ова беше договорено на денешната средба во Приштина меѓу министерот за надворешни работи Никола Попоски и вицепремиерот и министер за надворешни работи на Косово, Хашим Тачи на која беа потпишани договори за преминување на границата со биометриски лични карти и за отворање на новиот граничен премин за меѓународен патен сообраќај Белановце-Станчиќ.

-На средбата водевме отворени пријателски разговори за повеќе теми кои се значајни за нашите граѓани во делот на економијата, образованието, науката, културата, безбедноста и инфраструктурата. Наш стратешки интерес е да имаме стабилен и просперитетен сосед во Република Косово и токму во таа насока ги потпишавме и двата денешни договора – Билатералната спогодба за условите за патување на државјаните на двете земји и Протоколот за начинот на изградба и за отворање на новиот заеднички граничен премин, рече министерот Попоски на прес-конференцијата во Приштина.

Тој нагласи дека на средбата станало збор и за реализација на заедничките инфраструктурни проекти и за можноста за тоа да се добијат средства од Европската унија и меѓународните финансиски институции.

-Значајно е соработката да ја развиваме и во рамки на Европската унија. За нас е од стратешки интерес сите наши соседи да бидат стабилни и просперитетни и да можеме сета соработка која досега ја имаме да ја унапредуваме, рече Попоски.

Косовскиот вицепремиер Тачи нагласи дека Косово и Македонија имаат одлични односи и додаде дека Македонија е значаен стратешки, политички, економски, дипломатски и безбедносен партнер на Косово.

-Денеска е нов момент за нашите народи. Потпишавме важни договори за граѓаните на Косово и Македонија. Ќе работиме на брза имплементација на двата договора, рече Тачи и се заблагодари за македонската поддршка на Косово во меѓународните институции, а особено во УНЕСКО.

Посочи дека одличната соработка меѓу двете земји придонесува за мирот и стабилноста на регионот и додаде дека Косово ќе се заложи успешно да ја заврши изградбата на автопатот од Приштина до македонската граница.

Соработката со соседните земји, мирот и стабилноста во регионот и интеграцијата во ЕУ и НАТО, се заеднички приоритети на Македонија и на Косово, истакна Хашим Тачи.

-Интерес на Косово и на целиот регион е Македонија што поскоро да стане дел од НАТО, а целиот регион да продолжи да се движи кон интеграција во ЕУ, рече Тачи.

Повтори дека Приштина го поддржува целосното спроведување на Охридскиот рамковен договор. Најави дека Приштина и Скопје ќе ја продлабочат соработката и во борбата против екстремизмот и радикализмот, како и во справувањето со актуелната мигрантска криза.

Доколку преземете содржина од оваа страница, во целост сте се согласиле со нејзините Услови за користење.