Македонија

Од утре продолжува наставата во ОУ „Јосип Броз Тито“ во Струга

Од утре продолжува наставата во ОУ „Јосип Броз Тито“ во Струга

Во Централното основно училиште „Јосип Броз Тито“ во Струга каде од вчера наставата беше во прекин поради незагревање на училниците денеска се испорачани околу десет тони нафта.

В.д. директорот на училиштето Тони Савески изјави дека нафтата е донесена во објектот, а дел од неа, во текот на денот ќе биде испорачана и во подрачните паралелки во селата Враништа и Мислешево.

– Количеството нафта што го добивме денеска, во зависност од временските услови, ќе ни биде доволно за околу два месеца, односно до Нова година, но добивме ветување дека за две до три седмици или најдоцна за еден месец ќе ни биде испорачано ново количество на енергенсот, изјави Савески.

Тој информира дека учениците утрово не дошле на часови, но, како што најави, од утре наставата ќе продолжи да се одвива нормално.

Во училиштето „Јосип Броз Тито“ во Струга, како и во подрачните објекти во Мислешево и Враништа, учат околу 800 ученици. Откако опаднаа температурите на воздухот, тие немаа греење во училниците поради што имаа скратени часови, а од вчера, како што одлучи Советот на родители, наставата е во прекин.