ТОП,Македонија

Одбиен предлогот на СЈО за мерка притвор за уште четири лица

Одбиен предлогот на СЈО за мерка притвор за уште четири лица

По неколкучасовниот распит, судијата во претходна постапка од одделот за организиран криминал и корупција при Основниот суд Скопје 1-Скопје синоќа го одби предлогот на Специјалното јавно обвинителство за определување мерка притвор за лицата осомничени за сторени изборни измами во предметот „Титаник“.

Како што соопшти Основниот суд Скопје 1 – Скопје, на сослушување вчера се јавиле лицата Г.Ј., К.Б., К.Т. и Н.В. за кои Обвинителството за гонење кривични дела поврзани и кои произлегуваат од незаконското следење на комуникации поднесе предлог за определување мерка притвор за обезбедување присуство заради непречено водење на кривична постапка.

– По сослушување на лицата во присуство на нивните полномошници, судијата на претходна постапка, во законски предвидениот рок од 6 часа по завршување на сослушувањето, донесе одлука со која го одби предлогот на обвинителството, стои во соопштението од Основниот суд Скопје 1 – Скопје.

Образложението на судијата на претходна постапка, се посочува, е опфатено во одлуката која е доставена до странките кои имаат право на жалба до овој суд во рок од 24 часа.