По сознанијата од Министерството за внатрешни работи дека во полициска станица пристапиле две лица, од кои еден малолетник, кои се пријавиле како извршители на кривично дело, надлежниот јавен обвинител од скопското Основно јавно обвинителство издаде наредба за препознавање. На извршеното препознавање, како што соопшти денеска ОЈО Скопје, еден од оштетените ги препознал пријавените како сторители на кривичното дело во кое животот го загуби 19-годишниот Леарт Адеми.
– Поради комплексноста на настанот, времето на случување на кривичното дело во вечерните часови, како и претходно извршеното препознавање при кое оштетениот препозна друго осомничено лице на кое веќе за овој кривично правен настан е определена мерка – притвор, Основното јавно обвинителство-Скопје итно презема мерки за расветлување на настанот, се вели во соопштението.
Ценејќи дека се исполнети законските основи, а со цел обезбедување на непречено вршење на дејствијата во постапката, надлежен обвинител достави предлог за определување на мерка притвор за полнолетното лице кое беше едно од ново пријавените. Согласно на утврдените факти во предметот, за осомничениот е донесена наредба за спроведување на истражна постапка за сторено кривично дело „убиство“ од Кривичниот законик. Судија на претходна постапка од Основниот суд Скопје 1 – Скопје го прифати предлогот и на осомниченото лице му е изречена мерка притвор во времетраење од триесет дена.
За малолетникот кој исто така се товари за сторено кривично дело „убиство“, но и за телесна повреда поведена е постапка пред судија за малолетници, каде е поднесено барање и за определување на мерка притвор. Судијата има донесено решение со кое на малолетното осомничено лице му е изречен притвор со времетраење од триесет дена.
До надлежниот суд доставен е предлог за укинување на мерката притвор за претходно осомничениот и негова замена со поблага мерка на обезбедување. Надлежниот суд со решение го прифати предлогот, на осомничениот му го укина притворот и му изрече мерки за обезбедување.
Постапката во обвинителството продолжува со преземање мерки и дејствија со цел утврдување на фактите во предметот.
