Околу 10 илјади земјоделци од Тиквешијата аплицираа за субвенции, соопштија денеска од подрачните служби на Министерството за земјоделство, шумарство и водостопанство во Кавадарци и Неготино, објави МИА.
– Околу 6.300 земјоделци од Кавадаречко и Росоманско аплицираа во нашите простории. Се работи за лозари, овоштари, градинари, пчелари и сточари. Во моментов тече обработката на податоци, информираше Зоран Шалев, раководител на службата во Кавадарци.
Од Неготинско и Демиркаписко документи за субвенции поднеле околу 3.550 земјоделци, информира Златко Пенков, раководител на подрачната единица во Неготино.
Инаку, во подрачните единици тече аплицирањето за земјоделците кои сакаат да користат субвенции при осигурување на земјоделските култури. Сите што ќе го осигураат својот род, државата ќе им плати 60 проценти од трошокот за осигурување.