Нов претседател на Одборот на директори на Македонски Телеком е Панче Кралев, кој досега ја вршеше функцијата неизвршен член. Кралев е избран на функцијата на денешниот вонреден состанок на Одборот на директори.
Одборите на директори на Македонски телеком и на Т-Мобиле Македонија денеска на вонредни состаноци донеле одлука за одобрување на спроведување на најавената интерна истрага во овие компании.
На состаноците, според соопштението од компаниите, е одобрено склучување анекс на Спогодбата за присоединување на Т-Мобиле Македонија АД Скопје кон Македонски Телеком, првично одобрена и склучена на 31 октомври 2013 година.
Согласно анексот, деловните активности на Т-Мобиле Македонија, како друштво коешто се присоединува, ќе престанат заклучно со 30 јуни годинава, соопштија денеска телекомуникациските компании.
Спогодбата за присоединување и нејзинот анекс ќе бидат предмет на конечна потврда од страна на собранијата на двете друштва, коишто треба да го одобрат присоединувањето на Т-Мобиле Македонија кон Македонски Телеком, со што ТММК ќе престане да постои.
Одборот на директори на Македонски Телеком на својот состанок го одобри и новиот предлог за усвојување нов статут на Друштвото, што ќе биде со примена од 1 јули годинава, по негово усвојување од Собранието на МКТ. Претходниот предлог за нов статут на Друштвото беше составен дел на првично склучената спогодба за присоединување на ТММК кон МКТ.
– Новиот Предлог за усвојување нов статут на Друштвото произлегува од одобрувањето склучување на анексот на Спогодбата за присоединување на Т-Мобиле Македонија кон Македонски Телеком, во кој се менува датумот на кој ќе престанат деловните активности на TMMK, како резултат на што се менува и датумот од кој ќе се применува новиот статут – се вели во соопштението од компанијата.