Македонија

Пензионери од Скопје организирано го посетија Археолошкиот музеј

Пензионери од Скопје организирано го посетија Археолошкиот музеј

Пензионери од Скопје денеска организирано го посетија Археолошкиот музеј за да ги разгледаат артефактите и да се информираат за нивниот историјат од водичите во оваа национална установа, каде што беше и министерката за култура Елизабета Канческа-Милевска и претседателот на Сојузот на пензионерите на Република Македонија Драги Аргировски, пренесе МИА.

02 poseta na arheoloski muzej

– Пензионерите се овде денеска на нивна иницијатива и можеа да се запознаат со вредните оригинални артефакти од нашето богато археолошко наследство, кои се претставени на неколку нивоа, почнувајќи од праисторијата, па се до средниот век, рече Канческа-Милевска, соопштувајќи дека од крајот на октомври, кога беше отворен, Археолошкиот музеј досега примил над 15.000 посетители.

Таа подвлече дека за пензионерите се отворени сите институции од културата со попуст на влезниците од 50 отсто и дека е задоволна од желбата на луѓето во третото доба да посетуваат културни настани. Рече и дека Министерството за култура ја поддржува нивната манифестација – ревија на песни и ора.

01 poseta na arheoloski muzej

Претседателот на Сојузот Аргировски, исто така, е задоволен од соработката со Министерството за култура, посочувајќи дека таа е во интерес на околу 250.000 пензионери – нивни членови.

– Ова што го видовме е навистина нешто за паметење. Пензионерите од Скопје денеска имаа можност да го посетат музејот, а веќе имаме барања и од пензионери од Битола, Велес, Прилеп, Охрид, Гевгелија, Штип и од други градови низ Македонија, кои во наредниот месец ќе дојдат за да ги видат овие убавини. Ова е светска работа. Таа предисторија, антика, монети и се друго заслужува респект и човек не треба да дојде само еднаш, туку повеќе пати, изјави Аргировски.

06 poseta na arheoloski muzej

Директорката на Археолошкиот музеј Весела Честоева рече дека вратите се отворени за посетители од сите возрасти и дека археолошката збирка постојано ја надополнуваат со нови наоди од локалитетите, така што во витрините сега има над осум илјади вредни артефакти.

– Археолошкиот музеј и натаму ќе биде промотор на движното културно археолошко наследство во Републиа Македонија и отворен за сите целни групи. Сегашниот број на изложени артефакти не е конечен, зашто сите предмети од  редовните археолошки ископувања кои ќе го поминат процесот на конзервација ќе бидат претставени во новата поставка, истакна Честоева.