Украинскиот претседател Петро Порошенко во интервју за францускиот весник „Либерасион“ повторно изјавил дека е неопходно во земјата да бидат распоредени мировни сили.
Мисијата на ОБСЕ е од суштинско значење за нас, но не е доволна. Затоа сметаме дека е потребно да имаме мировни сили во земјата, истакна Петро Порошенко.
На 4 јуни Врховната Рада усвои закон, со кој се дозволува за поддршка на мирот и безбедност во Украина да се ангажира и контингент од странство.
Меѓународна операција за поддршка на мирот и безбедноста во Украина ќе гарантира ефикасно спроведување на протоколот од консултациите на Контакт групата, се наведува во документот.
Претходно, рускиот министер за надворешни работи Сергеј Лавров изјави дека доколку во Украина бидат распоредени мировни сили на ОН, тоа би ја поделило земјата на два дела.
Малезискиот авион во Украина е урнат од ракета на проруските сили
Авионот на компанијата „Малезија ерлајнз“, кој пред речиси една година се урна во источниот дел на Украина, при што загинаа сите 298 патници, е соборен со ракета на проруските сили, извести Си-Ен-Ен, повикувајќи се на предлог-извештајот на холандските експерти, објави МИА.
Во документот кој има неколку стотина страници е наведен точниот тип на ракетата со која е соборен авионот на летот МН17, како и нејзиното движење, изјавил извор близок до истрагата.
Друг извор, кој имал увид во извештајот, тврди дека во него постои реконструкција на летот на малезискиот авион, од минута во минута, како и идентификација на делот од територијата од каде што е истрелана ракетата, со што одговорноста за уривање на авионот се препишува на проруските сили.
Во извештајот, според тврдењата на двата извора, дел од одговорноста се префрла и на авиокомпанијата „Малезија ерлајнз“, бидејќи другите компании ја избегнувале зоната на конфликтот.
Се очекува крајниот извештај да биде завршен и објавен во првата половина на октомври оваа година.
