Петров: Македонија ќе биде транзитна земја за рускиот гас кон Европа

Македонија ќе биде транзитна земја за рускиот гас кон Европа – вели во интервју за МРТ заменик – претседателот на Комората за трговија и индустрија на Руската Федерација, Георги Петров.

Петров  објаснува дека проектот „Турски тек“ се уште е во зародиш, со многу отворени прашања и проблеми што треба да се надминат, во прв ред меѓу Гаспром и европските партнери, но се зголемува потребата од природен гас на стариот контитент и тука е шансата на Македонија.

-Сите енергетски аналитичари очекуваат да се зголемува потрошувачката на природен гас во Европа. Секој гасовод е оправдан, ако од една страна има доволно ресури, а од друга страна има потреба. Верувајте ми – Русија ги има потребните ресури, а има и побарувачка. Затоа сметам дека ќе се реализира овој гасовод, а Македонија нема да биде само потрошувач, туку транзитна земја за рускиот гасж, вели Петров.

Според него Македонија не треба да се плаши од рускиот капитал кој е особено присутен во енергетскиот сектор.

Со проектот за изградба на гасовод што го работи „Стројтранс гас“, вреден 75,5 милиони долари, Македонија ќе добие поевтина и поеколошка енергетска алтернатива, а тоа ќе значи и подобрување на бизнис – климата, со што може да се очекуваат и нови инвестиции од Русија.

-Според официјалните податоци, во Македонија веќе се влезени 400 милиони долари руски инвестиции. Тоа воопшто не е мала бројка, иако не е конечна. Ќе дојдат нови руски инвестиции, бидејќи Владата на Македонија многу работи на привлекување руски инвестиции во Македонија. Условите за инвестирање во Македонија се подобруваат. Иако се работи за мал пазар, тој е многу атрактивен како резултат на географската позиција и економските врски со другите земји. Македонија не треба да се плаши од рускиот капитал бидејќи рускиот бизнис е одговорен, креира нови работни места, плаќа даноци, а влијае и на подобрување на инфраструктурата, истакна Георги.

Туризмот е секторот со најголем потенцијал за соработка меѓу Македонија и Русија. Тука е и пласманот на македонски земјоделски и прехранбени производи на тамошниот пазар, кој лани креираше половина од вкупниот извоз во оваа земја. Потребен е договор за слободна трговија но, според Петров, ова нема да биде едноставана операција бидејќи Русија е дел од Евроазиската економска унија. Според ДЗС, лани размената со оваа земја достигнала 182 милиона долари, од кои само 42 милиона отпаѓаат на нашиот извоз.

Доколку преземете содржина од оваа страница, во целост сте се согласиле со нејзините Услови за користење.