Еден од најпознатите пијанисти во светот, Аркадиј Волдос, вечерва со почеток во 21 часот ќе одржи концерт во црквата „Света Софија“ во Охрид во рамки на фестивалот „Охридско лето“.
Волдос е познат како „гениј на клавијатурата“ кој се одликува со поетичност во изведбите. Вечерва, за публиката на „Охридско лето“ ќе изведе композиции од Франц Шуберт, Јоханес Брамс и Роберт Шуман.
„Несомнено е дека Аркадиј Волдос е името по кое ќе се памети 54-тото издание на фестивалот. Особено ми е драго што по неколку години преговарање, конечно го имаме маестрото прв пат во Македонија“, изјави селекторот nа фестивалот, Гордана Јосифова-Неделковска.
Волдос е предводник на пијанистичката елита на денешницата. Настапувал во Европа, Азија и Америка каде соработувал со најеминентните оркестри.