Почна исплатата на авансната помош за граѓаните од поплавените подрачја

Министерството за финансии информира дека сите граѓани кои ги евидентирала Комисијата за проценка на штетите во подрачјата зафатени од поплавите во скопскиот и тетовскиот регион ќе бидат опфатени со авансната исплата на средства според динамиката со која податоците стигнуваат во ресорното министерство.

– Тоа значи дека во попладневните термини средствата ќе бидат достапни за граѓаните од поплавените региони. Исплатата ќе перодолжи и во наредниот временски период, согласно податоците кои ќе ни бидат доставувани од Комисијата за надомест на штети. Се работи за префрлање средства на 2.154 граѓани, рече Миноски.

Граѓаните можат да ги подигнат парите на шалтерите на банките со документи за идентификација – лична карта или пасош. Секое семејство треба да добие надомест од 500 евра, кои им се неопходни за почетно санирање на штетите. Аванс ќе им биде исплатен и на другите поплавени семејства.

Како тимовите за проценка на штети завршуваат со работа во домовите, така и граѓаните телефонски ги пријавуваат своите сметки во деловните банки на кои треба да им легнат парите од авансното обесштетување. Пријавувањето се врши на четири фиксни телефонски линии, но и на мејлот на Министерството за финансии и со СМС порака со име и презиме и име на банката на мобилниот број 070/271-410.

Откако тимовите за проценка на штети ќе завршат целосно со работата, ќе следува исплатата на штетата, при што износот на авансното обесштетување ќе биде одбиен од целата сума.

Доколку преземете содржина од оваа страница, во целост сте се согласиле со нејзините Услови за користење.