Средното училиште „Шаип Јусуф“ во Шуто Оризари денес почна со настава. Заменик министерот за образование и наука Спиро Ристовски денес беше во посета на училиштето за да ја утврди состојбата и да се увери дека наставата се одржува.
Станува збор за исклучително значајна политичка, но пред се, образована одлука за отворање на ова училиште. Минатите денови бевме сведоци на голем број зли јазици кои не веруваа дека ова училиште ќе почне со работа. Училиштето сепак работи, во него се префрлени од веќе запишаните 64 ученици во прва и втора година, во економска, фризерска и градежна струка. Ова за нас претставува значаен мотив и потврда дека одлуката која сме ја донеле е исправна. Предвидено е во следната година да се запишат ученици во здравствена и угостителско-туристичка струка, истакна Ристовски, пренесува „Курир“.
Заменик министерот додаде дека завршени се сите административни работи и наставата се одвива според планираниот тек.
На овие ученици во меѓувреме им се обезбеди бесплатен превоз, бесплатни учебници, целокупната поддршка, нивно внесување во единствениот информациски систем на МОН како нов субјект. Мислам дека денес со нашата посета овде потврдуваме дека од исклучително значење е завршувањето на целата процедура, вели Ристовски.
Тој додаде дека обезбеден е наставниот кадар во соработка и поддршка на Град Скопје, како и административниот кадар.
Учениците кои денес го имаа првиот училишен ден во ова училиште велат дека се задоволни што сега имаат можност да учат блиску до својот дом бидејќи на тој начин значително им се намалуваат трошоците.
Првото средно училиште во Шуто Оризари официјално беше отворено пред еден месец. Училишниот објект се протега на површина од 4.405 метри квадратни, а наставата ќе се одвива во 12 училници, 4 кабинети. Училиштето има фискултурна сала, библиотека и читална.