Македонија

Попоски се сретна со Нуланд

Попоски се сретна со Нуланд
Попоски се сретна со Нуланд

Министерот за надворешни работи на Република Македонија, Никола Попоски, денеска го прими помошникот државен секретар на Соединетите Американски Држави за европски и евроазиски прашања, Викторија Нуланд, која престојува во работна посета на нашата држава.

Како што информираат од МНР, на средбата соговорниците изразиле задоволство од досегашниот развој на односите меѓу двете пријателски држави, втемелени на Декларацијата за стратегиско партнерство и соработка, како и заемно истакнатиот интерес за нивно натамошно унапредување, во сите области од заемен интерес.

Се разговараше за стратешката определба на Република Македонија за што е можно поскоро зачленување во НАТО и започнување на преговорите за пристапување во Европската унија, за што Соединетите држави даваат недвосмислена поддршка.

– Во светло на наредниот самит на Алијансата во Варшава идната година, исполнетоста на критериумите за членство и учеството на припадниците на АРМ во рамките на повеќе мировни мисии, ни даваат полно право да инсистираме на надминување на сите пречки за нашето зачленување. Република Македонија е посветена на почитување на демократските принципи и меѓународното право. Истото го очекуваме и од сите наши партнери, подвлече министерот Попоски.

Соговорниците разменија мислења и за актуелните внатрешно – политички состојби и предизвици во Република Македонија.

Министерот попоски нагласи дека поскоро надминување на политичката криза е интерес на македонските граѓани и економијата.