Посебен сообраќаен режим за движење на камиони

Од денеска до крајот на август во Македонија се воведува посебен сообраќаен режим за тешките товарни возила на државните патишта, според одлука од Министерството за транспорт и врски.

До 31 август ќе биде забранет сообраќај на тешки товарни возила со вкупна маса над 15 тони за време на деновите од викендот и во денови во екстремно високи температури. Забраната за деновите од викендот е: во петок од 17 до 22 часот; сабота од 9 до 18 часот и недела од 9 до 22 часот. Во деновите со екстремно високи температури, определени од Министерство за здравство, забранaта ќе важи и од понеделник до четврток од 11 до 17 часот. За регулирање на сообраќајот и воспоставување на изменетиот режим, поставена е соодветна сообраќајна сигнализација.

Ограничувањето не се однесува на возила кои превезуваат животни, цвеќе, хуманитарна помош, жито и житни култури и леснорасиплива стока, нафта и нафтени деривати, превоз на опасни материјали и возила кои вршат превоз за компании кои имаат склучено договори за изведување на проекти на државните патишта со ЈП за Државни патишта.

На патниот правец Гостивар – Охрид од денеска на сила е ограничениот режим на движење за тешки товарни возила над 7,5 тони. Ограничувањето на движењето е во следните периоди: петок од 15  до 24 часот, сабота и недела од 7 до 24 часот. Овој режим на движење ќе важи до 1 септември.

Посебен режим за камиони има и во Скопје уште од 16 јуни. Забрането е движењето на тешки товарни возила на подрачјето на Град Скопје секој ден од 10 до 20 часот, а така ќе биде до 1 септември. Од ова решение се изземаат возилата кои превезуваат жива стока, лесно расиплива стока, хуманитарна помош, медицински препарати, комунални возила, возилата на ЈГП, превоз на експлозивни, запаливи и отровни материи, возила за превоз на градежни материјали (сиров бетон), како и градежна оператива кои вршат градежни работи на градилиштата за Општините во Скопје, Град Скопје и Влада на РМ.

На регионалниот пат Пробиштип – Кратово поради појава на свлечиште, на влез во Кратово, воведена е забрана за движење на автобуси и товарни моторни возила со тежина над 7,5 тони.

На патниот правец Р2433 Радовиш – Конче, на 11-тиот километар има свлечиште, поради што сообраќајот за патничките возила се одвива по една коловозна лента, а за тешките товарни возила има забрана за сообраќај.

На патниот правец Кичево – Охрид во близина на Ботун поради изведување на градежни работи на пат, сообраќајот се одвива наизменично регулиран со семафори.

На патниот правец А2 од влезот до излезот на Кичево се изведува надградба на асфалтна подлога.

На патниот правец А1 Гевгелија – Скопје од надвозникот кај клучка Велес до наплатната станица Отовица се изведуваат работи на мостовите, а сообраќајот по тие мостови се одвива по една сообраќајна лента.

На патниот правец Р1105 Фурка – Дојран, се изведуваат градежно-асфалтерски работи. Поставена е соодветна патна сигнализација.

На патниот правец Велес – Штип врши реконструкција и рехабилитација од депонијата Велес до с.Лозово.

На сите овие патни правци за изведувањето на градежните работи има поставено соодветна патна и сообраќајна сигнализација.

Сообраќајот на сите останати државни патишта во Македонија се одвива без забрани, по суви коловози.

АМСМ препорачува внимателно возење, прилагодена брзина на движење и почитување на поставената сообраќајна сигнализација. Посебно внимание е потребно на делниците кои минуваат низ клисурите и засеците, особено на патните правци Катланово – Велес, Маврово – Дебар – Струга, Демир Капија – Удово, каде е можна почеста појава на одрони.

Интензитетот на сообраќај на патните правци надвор од градските средини претпладнево е зголемен.На граничните премини нема подолготрајни задржувања за влез и за излез од државата. Напомена дека оваа информација се однесува само за македонската страна на премините.

 

Доколку преземете содржина од оваа страница, во целост сте се согласиле со нејзините Услови за користење.