Претставници на охридската локална самоуправа предводени од градоначалникот Никола Бакрачески денеска поставија камен-темелникот на новиот објект на затворениот градски пазар.
Бакрачески истакна дека станува збор за исполнување на едно од ветувањата дадени кон граѓаните на чија реализација, како што истакна, и претходела комплексна и обемна постапка за обезбедување на потребната документација.
„Со оваа капитална инвестиција Охрид ќе добие нова административно-деловна зграда и најсовремен пазар што ќе ги исполнува сите стандарди за трговија и ракување со земјоделски и прехранбени производи од животинско потекло“, рече градоначалникот.
Станува збор за инвестиција што ќе се реализира по пат на јавно приватно партнерство на oпштината со АД „Илинден“ од Струга, во вредност од речиси четири милиони евра. Објектот е превидено покрај основните инфраструктурни содржини како деловни простории, 190 тезги изработени по сите стандарди, да има и подземен јавен паркинг и тоалети.
