Голем пожар избувна претпладнево во магацин на словенечкиот трговски синџир „Меркатор“ во љубљанската приградска населба Залог и се уште не е изгаснат.
Според првичните информации, како што јави Фена, огнот се појавил во ладилникот за свежа храна, а на местото на инцидентот се наоѓаат полиција и пожарникари.
Опожарени се околу 3.000 метри квадратни од магацинскиот простор со зеленчук, овошје и месо, тврдат од „Меркатор“, каде и покрај уништениот магацин се настојува да не дојде до проблем во редовното снабдување на нивните маркети во Словенија. Поради безбедносни причини евакуирани се неколку објекти во близина.
Засега официјално не е позната причината за пожарот, како ни големината на штетата.