Македонија

Пратеникот Николоски во работна посета на Париз

Пратеникот Николоски во работна посета на Париз

Александар Николоски, шеф на Делегацијата на Собранието на Република Македонија во Парламентарното собрание на Советот на Европа, ќе учествува во работата на Комисијата за политички прашања и демократија во својство на член, како и на Мониторинг комисијата во својство на потпретседател, на 16 и 17 март 2015 година, во Париз, Франција.

Дневниот ред на Комисијата за политички прашања и демократија, во која членуваат шефовите на делегациите на земјите-членки предвидува дискусии за состојбата во Белорусија, учеството на странски борци во борбите во Сирија, политичката криза во Украина, а ќе биде дадена и евалуација на партнерството за демократија во однос на Парламентот на Мароко, во рамките на проектот за зајакнување на односите и промовирање на поблиски врски со парламентите на соседните земји на Европа.

На седницата на Мониторинг комисијата, која ќе се одржи зад затворени врати, пратенците ќе го разгледуваат извештајот за пост-мониторинг дијалогот со Монако, извештајот за пост-мониторинг дијалогот со Црна Гора, потоа Резолуцијата за санкциите во однос на руската делегација во Парламентарното собрание, а ќе биде поднесен и прелиминарен извештај за првата група од четири држави, кои не се во мониторинг или пост-мониторинг постапка, и тоа Андора, Белгија, Хрватска и Кипар.