Неговиот кабинет информира дека Иванов во 15:30 часот ќе ги посети припадниците на Армијата на Република Македонија и другите безбедносни служби задолжени за обезбедување на државната граница, на граничниот премин „Меџитлија“.
Претседателот Иванов во средата одржа работна средба со раководителите на субјектите задолжени за превенција и справување со кризната состојба, намалување на ризикот од терористички напади и обезбедување за оддржување на изборите. Беше констатирано дека субјектите во кризниот менаџмент задолжени за превенција и справување, разузнавањето, армијата и полицијата, 15 месеци постапуваат по плански активности и имаат предвидено сценарија и одговор при зголемување на ризиците од закана, соопшти кабинетот на Иванов.
Заради постојаната закана од илегална миграција која доаѓа од територија на НАТО и ЕУ членки, во Македонија од август 2015 година до јуни 2017 година е прогласена кризна состојба, активиран е кризниот менаџмент со функционален здружен воено-цивилен штаб за заштита на границите и обезбедување на коридорите.
Претседателот Иванов за време на посетата на Битола, вечер (19:00) ќе присуствува и ќе има обраќање на свечената академија по повод патрониот празник на Универзитетот „Св. Климент Охридски“, во Н.У. Центар за култура – Битола.