Привремената Влада на Грција ќе положи заклетва денес. Владата на чело со времената премиерка на Грција, Василики Тану која вчера положи заклетва, ќе ја предводи земјата до вонредните парламентарни избори.
Тану синоќа и официјално ја презеде функцијата од Алексис Ципрас.
Со задоволство Ви посакувам добредојде, бидејќи ја поздравувам првата жена премиер во историјата на грчката демократија. Сигурен сум дека и вие и Владата која утре ќе ја именувате ќе работите најдобро што можете. Сакав да Ви посакам се најдобро. Ќе сторам се што е можно да се одржат избори во цивилизирана средина, рече Ципрас на средбата со Тану, пренесе МИА.
Тану: Привремената Влада ќе треба да се справи и со прашањата за миграцијата
Грчката премиерка, пак, рече дека иако главната улога на привремена Влада е да спроведе избори, можеби ќе треба да се преземат и дејствија за тековните кризи, како што е миграцијата.
Главната улога на привремената Влада, како што знаат сите, е да спроведе фер избори. Но, верувам дека оваа Влада ќе биде повикана да се справи со клучни прашања, како што е миграцијата, изјави Тану, додавајќи дека нејзината Влада ќе стори се за да ги извршува своите обврски на најдобар можен начин.
Ова е составот на новата грчка влада
Во меѓувреме, грчката државна агенција АНА-МПА, повикувајќи се на свои извори, го соопшти составот на Привремената Влада на Грција.
Министер за надворешни работи ќе биде Петрос Моливијатис, министер за финансии Јоргос Хулиракис, министер за одбрана Јоанис Јангос, министер за внатрешни работи Андонис Манитакис, за административни реформи Михалис Спурдалакис, за цивилна заштита Андонис Макридимитрис, за култура Марина Ламбраки-Плака, за правда Димитрис Папангелопулос, за економија Никос Христодулакис, за образование Фросо Киау, за транспорт Христос Зоис, за труд Димитрис Мустакас, за туризам Алкистис Протопсалти, за здравство Атанасиос Димопулос, за борба против корупцијата Панајотис Николудис, додека портпарол на Владата ќе биде Родолфос Моронис.
