Во медиотеката на локалната библиотека „Гоце Делчев“ во Велес, УСАИД во соработка со општина Велес ќе го организира четвртиот регионален промотивен настан на кој ќе бидат претставени проектните активности и успешните приказни на лица со попреченост кои се вработиле или добиле практикантски ангажман преку проект на оваа меѓународна организација, пренесува МИА.
Поканети се претставници од општините од Вардарскиот регион, како и од компании, невладини организации и јавни институции.
Проектот на УСАИД за практикантска работа и вработување на лица со попреченост има за цел да ја зголеми социјалната инклузија и учеството на лицата со попреченост во целните региони поддржувајќи го нивното вработување и зголемувајќи ги економските можности.
Ова цел се остварува со подобрување на нивните вештини за вработување преку организација на пракси и обуки, како и учество во кампањи за подигнување на јавната свест со што ги прави овие прашања повидливи за приватниот сектор и локалните заедници.
Проектот започна во август 2012 година и ќе трае четири години. Помошта од проектот е наменета за лицата со попреченост од Скопје, Велес, Куманово, Штип, Пробиштип, Свети Николе, Тетово, Гостивар, Струга, Дебар и Кичево.