Во рамките на Јубилејна 15-та Литературна манифестација „Илинден“ 2014, во Домот на култура „Илинден“ во нас. Илинден, во присуство на голем број љубители на пишаниот збор, беше промовирана книгата „Антологија на балканскиот расказ“ на Раде Силјан.
За ова исклучително значајно дело зборуваше промоторот Весна Мојсова Чепишевска.
„Велат, расказите се огледало на актуелната состојба, а секој автор поместен во овој избор од Раде Силјан, на свој начин, си ја раскажува својата приказна. Инспирирани од бифокалната перспектива за Балканот-онаа создавана од светот за него, или барем од оној дел на светот кој не доживува нас Балканците како мрачен топос на хаотичност и непросветеност, овие 73 избрани автори во своите 73 раскажани приказни понекогаш отворено ги демистифицираат стереотипите, а многу често допуштаат да победи љубовта, љубовта над и пред се,“ истакна проф. д-р Весна Мојсова Чепишевска.
Покрај авторот Раде Силјан, на присутните им се обрати и нашиот познат писател Блаже Миневски.
Со звуците на убавата македонска песна промоцијата беше збогатена со настап на првите дами на македонската народна музика Виолета Томовска и Блага Петреска.
