Полицијата ги пронајде парите кои разбојникот ги украл од Стопанска банка.
Парите биле пронајдени за време на полицискиот увид во автомобил „цитроен“, со кој крадецот побегнал по грабежот.
Четириесет и тригодишниот скопјанец А.М. маскиран и вооружен со пиштол влегол во филијалата на Стопанска банка во скопската населба Ѓорче Петров и заканувајќи им се на вработените ги одзел парите.
Откако излегол од банката со автомобилот се упатил кон Карпош, каде во близина на мостот Влајко бил пресретнат од припадници на полициската единица „Алфа“. А.М. кога ги забележал полициските екипи почнал да пука кон нив, на што „Алфите“ возвратиле.
Разбојникот набрзо го запрел автомобилот, но поради повредите кои ги добил бил веднаш пренесен во Ургентниот центар со возило на Брза помош. Лекарските екипи утврдиле дека станува збор за повреди во вид на расекотини од стакло, од прозорците на автомобилот кои се скршени.
Крадецот во болница е обезбедуван од полициски службеници.
