Македонија

Граѓанските здруженија ќе протестираат кај шефот на државата Протест кај Иванов, за одземање на мандатот на Заев

Протест кај Иванов, за одземање на мандатот на Заев

Група на здруженија организираат во четвртокот протест за одземање на мандатот од премиерот Зоран Заев од страна на претседателот Ѓорге Иванов, поради, како што кажуваат непридржување кон дадените гаранции и работењето против македонските национални и државни интереси, а за туѓи интереси и рушење на државата.

„Со одземањето на мандатот ќе биде овозможено да се преземат сите неопходни мерки за заштита на уставниот поредок и државата, од сите дејства со кои земјата/државата (Р.Македонија) и Македонскиот народ се ставаат под директна мирна окупација“, велат организаторите.

Мирниот протестен марш планирано е да започне во 17 часот пред канцеларијата на делегацијата на ЕУ, каде ќе има обраќање кон ЕУ и НАТО, а потоа маршот ќе продолжи по улицата Водњанска, се до вилата Водно, каде што на претседателот ќе му се предаде протестното барање.

Истовремено, поради непринципиелните политики кон Р.Македонија, мешањето во внатрешните политики на суверена, независна земја членка во ОН, на соодветен начин ќе се сензибилизира и интернационализира македонското прашање, со запознавање на светската јавност со Вистините за Македонија, и на сите држави, особено оние кои ја признале Р.Македонија под уставното име, од кои ќе браме поддршка поради наметнатата окупаторска диктатура во Македонија и геноцидните планови против Македонија и Македонскиот народ – се вели во повикот.

Како организатори на овој марш се потпишани Здружението на граѓани „Преродба“, Семакедонскиот национален совет Македониум, МПЗ Тврдокорни, Движењето за цивилизациски вредности и Единствениот пат – Движење на македонските носители и бранители на државниот суверенитет, кои повикуваат наместо Македонија да биди „линија на огнот“ да биде мостот на цивилизирана соработка помеѓу источната и западната цивилизација.