Свет

Протестите од Балтимор се проширија на Филаделфија

Протестите од Балтимор се проширија на Филаделфија
Police stand between protesters and the entrance to the Four Seasons Hotel in Philadelphia on Thursday, April 30, 2015. The event in Philadelphia follows days of unrest in Baltimore amid Freddie Gray's police-custody death. (AP Photo/Matt Rourke)

Протестите кои избија во Балтимор поради смртта на младиот Афроамериканец Фреди Греј, се проширија и на Филаделфија.

Синоќа судири избувнаа и во градот Филаделфија, во државата Пенсилванија, меѓу полицијата и демонстрантите, кои се солидаризираа со протестите против полициското насилство во Балтимор, пренесува МИА.

Близу илјада лица се собраа во Филаделфија, а дел од нив се обидоа да блокираат важна меѓудржавна магистрала, но беа разбиени од полицијата. Во немирите неколку полицајци се полесно повредени, а неколкумина најагресивни демонстранти се уапсени.

Околу 600 лица протестираа и во Балтимор, барајќи правда за Греј, пренесува Танјуг.

Ентони Батс од полицијата во Балтимор изјави дека полицискиот час ќе остане во сила и за време на викендот, бидејќи тогаш се очекуваат масовни маршеви.

Како резултат на немирите во Балтимор оваа недела, по демонстрациите по смртта на Греј додека беше во полициски притвор, повредени се околу сто полицајци, од кои најмалку 40 се хоспитализирани. Приведени се 201 демонстрант, од кои 106 се ослободени по 48 часа без подигнато обвинение.

Прелиминарна истрага не најде докази дека 25-годишниот афроамериканец Фреди Греј бил смртно ранет за време на неговото апсење од полицијата на 12 април. Ова го соопшти телевизија Еј Би Си синоќа, цитирајќи извори запознаени со полицискиот извештај и заклучоци на судскиот лекар, пренесе БТА.

Судскиот лекар утврдил дека смртоносната повреда на Греј била добиена кога тој се удрил во задниот дел на полицискиот минибус и очигледно го скршил вратот.