Од денеска официјално започна производство на електрична енергија во мини хидроцентрали на цевководите на потегот од „Калин Камен“, главен резервоар во Крива Паланка, и село Станци – „фабрика за вода“, пренесе МИА.
Хидро-елекратните се изградени со јавно-приватно партнерство на локалната самоуправа на општина Крива Паланка и инвеститорот „Хидро Осогово“, Скопје.
Годишното количество на електрична енергија кое ќе се произведува во електраните е 3,5 мегават часови. Покрај четирите хидроелектрани, заради оптимално производство на електрична енергија, инвестиравме и во нов цевковод, со стаклено-пластични цевки со должина од над 5 километри и рок на траење од 200 години, информира Жарко Кржовски од „Хидро Осогово“.
Вкупната инсталирана моќност ќе изнесува 681 киловат. Зголемениот капацитет ќе придонесе и за поголеми приходи за општината на која, според договорот, и припаѓаат 17 проценти од целокупното производство на електрична енергија.
Општина Крива Паланка учествуваше во партнерството со финансиски средства за урбанистички планови, физибилити студија, идејни и изведбени проекти, а договорот за јавно-приватно партнерство е помеѓу фирмата „Хидро Осогово“ и Јавното претпријатие „Kомуналец“ од Крива Паланка.
Општината ќе добива околу 70.000 евра годишен приход од овој проект, без да вложи ниту денар сопствени средства, а ние сме единствена општина во државата која има два паралелни водоснабдителни системи. Паралелниот цевковод го реши проблемот со водоснабдувањето за наредните 100 години, рече градоначалникот на Крива Паланка, Арсенчо Алексовски.
Според договорот, како што информира Кржовски, приватниот инвеститор ќе стопанисува со хидроцентралите 23 години, по што тие ќе преминат во сопственост на општината.
Финансирањето на изградбата на овие мини хидроцентрали беше обврска на приватниот партнер кој ќе има право комплетно да управува и стопанисува со хидроцентралите, со обврска да не го наруши системот за водоснабдување и снабдувањето со чиста и здрава вода за пиење.
Ова е втор проект кој општината го реализираше со јавно-приватно партнерство. Првиот беше за изградба на деловно-административен објект на општинската зграда кој беше ставен во функција лани на 8 октомври.