Путин: Турција ќе зажали за соборувањето на авионот

putin

Русија нема да заборави тоа што турските сили соборија руски воен авион и поради тоа Турција ќе зажали, изјави денеска рускиот претседател Владимир Путин.

Тој воедно нагласи дека Русија нема воено да се пресметува со Турција, меѓутоа истакна дека Турција „повеќе од еднаш“ ќе зажали поради она што го направи и дека се залажуваат оние кои мислат дека реакцијата на Русија ќе запре само на трговските санкции.

Во годишното обраќање до нацијата, Путин нагласи дека не може да го игнорира помагањето на терористите.

– Ние не ставаме знак на еднаквост меѓу турскиот народ и дел од денешната власт, која е директно одговорна за загинувањето на наш војник, нагласи Путин.

Тој рече дека секогаш ќе ги смета за „издајници“ оние кои им пукале в грб на руски војници.

– Само Алах знае зошто тоа го направиле. Веројатно Алах одлучил да ја казни владејачката структура во Турција, одземајќи им го разумот, наведе Путин во Кремљ по што следел громогласен аплауз.

Рускиот претседател додаде дека руската војска во Сирија се бори за безбедноста на земјата, истакнувајќи дека напорите на една држава не се доволни за да се порази меѓународниот тероризам.

– Земјите не треба да имаат двојни стандарди кон тероризмот, предупреди Путин.

Според него, „ако некој кој извршил воено злосторство, убиство на наши луѓе, мисли дека ќе помине само со домати или некои ограничувања во градежништвото, е во длабока заблуда“.

Доколку преземете содржина од оваа страница, во целост сте се согласиле со нејзините Услови за користење.