Егзодусот на македонските репрезентативци кој по завршувањето на Светското првенство во Катар се случува во тимот на Металург продолжува.
По Наумче Мојсовски, Филип Миркуловски, Ванчо Димовски, браќата Маркоски, Дејан Манасков, и Ацо Јоноски е еден од ракометарите на РК Металург кој го напушта македонскиот шампион.
Порталот Екипа пишува дека Јоноски веќе земал исписница за напуштање на клубот, а дополнително ќе одлучи каде ќе ја продолжи својата кариера.
“Чекав долго, но за жал немаше разврска за целата ситуација и затоа сум принуден да си заминам од клубот. Не е точно дека сум потпишал договор со друг клуб. Да, имам некои понуди, но дополнително ќе одлучам каде ќе ја продолжам кариерата” – изјави Јоноски за Екипа.
Исписница од клубот конечно доби и Павел Атман, кој сега слободно ќе може да го официјализира трансферот во Ал Ахли, а во периодот што следува се очекува Ренато Вугринец и Гоце Георгиевски да го напуштат Металург.