Здружението на кошаркарски играчи на Македонија, по повод ново настаната состојба во мак-баскетот преку соопштение се обрати до јавноста со апел проблемите што поскоро да се надминат во интерес на спортот во државата.
Во соопштението на македонските кошаркари стои:
“Сакаме да и се обратиме на целокупната спортска и поширока јавност и да го изнесеме нашиот заеднички став. Ова е став на сите македонски играчи од сите клубови кои учествуваат во Суперлигата, без исклучок.
Свесни сме дека нашите интереси, како играчи, се подредени на интересите на Клубовите во кои настапуваме и нивните Спонзори и тоа го почитуваме.
Најпрво сакаме јавно да им се заблагодариме и на Општините и на приватните компании за нивните огромни напори да обезбедат соодветни буџети за квалитетна кошарка, можеби во просек на квалитет по екипа, и најквалитетна клупска кошарка во целиот регион, а со сигурност најизедначена и најнеизвесна. Квалитетот на нашата клупска кошарка оваа година кулминира. Никогаш до сега немало шест рамноправни екипи со еднакви шанси да се борат за титулите, никогаш немало првенство во кое не може да се прогнозира ниту еден резултат, никогаш немало првенство во кое играле толку многу квалитетни играчи и домашни и странски. Затоа и никогаш претходно не биле толку посетени кошаркарските натпревари.
Но, не можеме да разбереме и прифатиме кога интересите се спротивни од основниот интерес кои сите нас не обединува и навивачите и играчите и тренерите и управите и спонзорите – спортскиот интерес, спортот, во вистинска смисла на зборот, спорт кој единствено се игра на спортскиот терен, во спортска борба за извојување на спортска победа , која единствено има вредност доколку е остварена на спортските терени. Не веруваме дека има спортист кој може да се радува на победа која не е извојувана на спортскиот терен.
Ние сме играчи и не сме компетентни да ги толкуваме Пропозициите и Правилниците и останатите акти на федерацијата. Како играчи само можеме од срце да апелираме и да ги замолиме сите инволвирани страни, што е можно побрзо да најдат начин да се разреши оваа ситуација. Убедени сме дека постои решение, но единствено ако спортскиот интерес се стави пред било кој друг интерес. Во спротивно, сите ќе бидеме губитници, а најмногу македонската кошарка.
СПОРТОТ СИТЕ НЕ ОБЕДИНУВА – СПОРСКИТЕ ПОБЕДИ ЕДИНСТВЕНО СЕ ИЗВОЈУВААТ НА ТЕРЕН!”