Во последниот натпревар од 24.коло во Примера, одигран на „Ел Мадригал“ иако домаќините имаа предност од два гола, сепак на крајот се радуваа гостите од Мадрид.
Првиот дел заврши без голови, а во вториот Виљареал преку Мануел Тригерос (50.минута) и Седрик Бакамбу (56) поведе со 2-0. Сепак, тоа не беше доволно „жолтата подморница“ да излезе како победник. Напротив. Реал успеа комплетно да го сврти резултатот, па со головите на, Герет Бејл (64), Кристијано Роналдо од пенал (74) и Алваро Мората (83), екипата на Реал на крајот славеше победа со 3-2.
Со новите три бодови „кралскиот тим“ се врати на врвот на табелата со бод повеќе од Барселона, која во првото дерби од оваа рунда го победи Атлетико во Мадрид со 2-1.
Севиља која со ист резултат го доби градското дерби против Бетис е на третата позиција со 52 бодови, два помалку од Барселона односно три помалку од лидерот Реал.
