Магазин

Рецепти за велигденската трпеза

Рецепти за велигденската трпеза

Нема ништо поубаво од уживањето во празничната трпеза со семејството. Важноста на храната најмногу се истакнува на Велигден, бидејќи овој голем христијански празник симболички претставува почеток и обнова на животот, па и јадењето кое на овој празник се подготвува ја поддржува таа традиција.

Велигденскиот пост се смета за најстрог во христијанството и секогаш почнува во понеделник. Тој трае 40 дена, а кулминира на Велики петок и Сабота, за да на Велигденската недела посното мени се замени со раскошна велигденска трпеза.

Првиот мрсен ручек после големиот велигденски пост не само што би требало да биде вкусен и разновиден, туку е неопходно и храната да се сервира на убаво уредена маса. Подготовката на оваа свечена трпеза е вистинска прилика во вашиот дом да создадете атмосфера на блискост.

На трпезата задолжително се принесуваат шарени јајца, печено месо и разноразни деликатеси.

Еве неколку предлози што да подготвите за велигденскиот ручек.

ПЕЧЕНО ЈАГНЕШКО МЕСО СО КОМПИРИ

Состојки:

– 1 килограм јагнешко месо
– 500 грама компири
– 4 чешниња лук
– 5 гранчиња мајчина душица
– 1 гранче рузмарин
– 5 лажици маслиново масло
– сол и црн бибер

Подготовка:

Рерната загрејте ја на 250 степени. Исчистете го месото, посолете го и ставете му црн бибер. Излупете ги компирите и исечете ги на коцки. Исчистете го лукот и исечкајте го тенко. Ставете го месото во рерната. Компирите, маслото, рузмаринот и мајчината душица добро измешајте ги, додајте им сол и црн бибер и рамномерно распределете ги во тавчето. Печете во рерна 20-ина минути, а компирите повремено промешувајте ги. Пред крајот додадете го сечканиот лук и вратете го тавчето во рерна уште неколку минути.

Јагнешкото извадете го од рерна и оставете го да се олади. Сервирајте го месото на голема чинија заедно со компирите.

ЛЕПИЊА СО КРОМИД

Тесто:

– 400 грама брашно
– половина коцка квасец
– 1 лажичка сол
– 200 милилитри млако млеко
– 100 грама свинска маст

Фил:

– 800 грама кромид
– 300 грама сланина
– 400 милилитри кисела павлака
– 4 јајца
– сол, црн бибер, рендано мускантно оревче, ким

Подготовка:

Во средината на просеаното брашно обликувајте вдлабнатина и во неа ставете го стасаниот квасец, кој претходно сте го ставиле во малку млако млеко со лажичка шеќер. Измешајте го добро тестото, покријте го и оставете го околу 30 минути да нарасне.

Растопете ја свинската маст и оставете ја да се олади, па со една лажичка сол ставете ја во садот со нараснатото тесто. Измешајте ја смесата добро, па повторно оставете ја покриена 30-тина минути да нарасне.

Кромидот исечкајте го на тенки крукчиња, а сланината на ситни коцкички. Во тавче без масло пропржете ја сланината (околу 5 минути), додадете го кромидот и мешајте 15-ина минути додека не омекне.

Павлаката измешајте ја со јајцата, додадете ги кромидот и сланината, зачинете со сол, црн бибер и мускантно оревче и лесно измешајте ја целата смеса.

Тавчето во кое ќе печете намачкајте го со малку маргарин, развијте го тестото рамно на тавчето, врз него ставете го филот и одозгора попрскајте го со малку ким по желба.

Печете околу 30-35 минути во рерна загреана на 200 степени.

ЧОКОЛАДНИ ЈАЈЦАСостојки:

– 350 грама чоколадо
– 250 грама шеќер
– 2 жолчки од јајце
– 1 лажица мелено кафе
– 100 грама путер
– 1 кесичка ванилин шеќер
– чоколадо во прав
– чоколадни и шарени украсни трошки

Подготовка:

Чоколадото растопете го на пареа. Одвоено изматете ја жолчката со шеќерот, додадете го путерот, кафето и чоколадото. Од изладената смеса обликувајте јајца, па извалкајте ги во чоколадото во прав и украсете ги со трошките.


Велигденски венец со суво грозје

 

Велигденските празници се пред нас, тие не зближуваат, не собираат на заедничка трпеза, а атмосферата е посвечена кога трпезата е убава и за очите, подеднакво исто како и за непцето.

veligdenska 1234

Велигденскиот венец со суво грозје  е традиционален во повеќе земји за оваа пригода, се разбира и во Македонија, и ако до сега не сте го подготвиле, пробајте го нашиот проверен рецепт.

Потребни намирници: 500 грама брашно, 1 свеж квасец, 250 милилитри млако млеко, 100 грама шеќер, 1 лимон, 80 грама суво грозје, 1 ванилин шеќер, малку сол, 2 јајца, 100 грама путер.

За украсување ние ви предлагаме ( а украсувањето може да биде и по ваша желба) – 2 жолчки, 40 грама бадеми, велигденски јајца.

Подготовка

Ставете го брашното во подлабок сад и во средината направете длабнатина. Во длабнатината ставете ги нараснатиот квасец и една лажица шеќер. Замесете го тестото и оставете го да стасува 15 минути. Размесете го тестото и додадете ги преостанатиот шеќер, ванилиниот шеќер, изренданата лимонова кора, јајцата, путерот и преостанатото млеко. Оставете го да стасува уште 15-тина минути, па додадете го сувото грозје свалкано во брашно.

Поделете го тестото на три еднакви дела и формирајте ленти со должина од 50 сантиметри. Од лентите направете плетенка и свиткајте ја во венец со пречник од 35 сантиметри. Венецот ставете го во немрснета тава обложена со хартија и оставете го да стасува 30-тина минути. Премачкајте го венецот со изматени жолчки и наросете го со исечкани бадеми (рендана чоколада, суво грозје, или по желба).

Печете 30-тина минути на температура од 170 степени.

Изладениот венец ставете го на елеагантна чинија, а во средината ставете неколку велигденски јајца.