Во рамките на законските надлежности, Општина Дојран и ЈКП „Комуналец – Полин“, започнуваат акција за расчитување на крајбрежјето во Стар Дојран.
Цел на акцијата, која ќе се спроведува наредниот период, е да се создаде почиста, поубава и здрава животна средина, настаната со целосното враќање на нивото на водата на Дојранското езеро.
Согласно предвидената динамика, акцијата ќе се спроведе во неколку фази кои ќе вклучуваат превентивни и репресивни мерки за отстранување на хаварисаните чамци и други објекти долж крајбрежјето, чистење од вегетација и разни други отпадоци, реконструкција на оштетените делови на кејот и попесочување на дел од крајбрежјето.
Се планира и формирање на комунална редарска служба во рамки на надлежностите на општината, чија грижа ќе биде исклучиво Дојранското езеро и крајбрежјето и водење континуирана грижа за почитувањето на законските прописи за чиста животна средина.
Од општина Дојран известуваат дека почнувајќи од 1 март, ќе се отстрануваат сите чамци кои се оставени или потонати на крајбрежјето.
Оттаму апелираат со цел да се избегнат дополнителни трошоци и потешкотии, сопствениците на чамци, кои не се во функционална состојба или се усидрени надвор од законските прописи, најдоцна до 1 март да ги остранат или соодветно да се погрижат за нив.
Сопствениците на објекти на брегот на езерото или во езерото, кои не поседуваат соодветна документација писмено ќе добијат рок за нивно отстранување, а исто така ќе се направи контрола врз концесионерите на плажите за евентуални недостатоци или пречекорувања на договорите за концесија.
Екипи на општината и јавното претпријатие ќе вршат контроли на состојбата, а утврдените прекршоци ќе се документираат и фотографираат и ќе се отстрануваат.
Од општината апелираат граѓаните активно да земат учество во спроведувањето и реализацијата на оваа акција.