Отпуштените од Транзитниот центар „Винојуг“:  Оставени сме без работа, а Ременски си вработи 36 сопартијци

Ромите кои по осум месеци работа во Транзитниот прифатен центар „Винојуг“ во Гевгелија беа отпуштени од страна на министерката за труд и социјална политика Фросина Ременски, денеска одржаа мирен протест пред кампот со барање да добијат одговор зошто не е најдено решение за тие да бидат вратени на работа, пренесува МИА.

Се собравме денеска да го изразиме нашето незадоволство. Ние не се откажуваме и остануваме да протестираме, бидејќи без причини бевме извадени од работа од страна на министерката за труд  и социјална политика Фросина Ташевска Ременски, рече Ѓорѓи Пакетов, претставник на 44. отпуштени лица.

По вчерашниот двочасовен разговор, продолжи Пакетов, ние не добивме никаков одговор од министерката Ременски.

Побаравме да ни каже зошто сме избркани од кампот и оставени без работа, а таа си вработи 36 нови сопартијци. Зошто за овие 44 лица кои се обучени, вакцинирани и го подигнаа кампот на едно високо ниво, не е направен некаков компромис, но не добивме одговор, рече Пакетов, додавајќи дека единствено им било понудено да прифатат да бидат вработени само 15 луѓе.

Според Пакетов овие луѓе се во кампот додека тој бил на нула и работеле на негова изградба и се најзаслужни за високото ниво на хигиената додека во него дневно минувале и по 15 илјади луѓе.

Никој од нас не е партиски определен. Бараме да дојдат и да најдат некое решение за нас, рече Пакетов.

Доколку преземете содржина од оваа страница, во целост сте се согласиле со нејзините Услови за користење.