Американската администрацијата ќе отвори нови центри за регистрација и проверка на бегалци од Сирија пред нивно испраќање на територија на САД.
Одлуката доаѓа откако во септември претседателот Обама најави дека САД ќе преземат дополнителни 10.000 сириски бегалци во 2016 година.
Американскиот стејт департмент објави дека ќе биде отворен центар за проверка на бегалци во ирачкиот град Ербил пред крајот на годината, а следната година повторно ќе почне со работа таквиот центар во Бејрут.
Белата куќа не соопшти колку дополнителни бегалци ќе примат САД над бројката од 10.000, но според претставници на американската администрација се бараат начини за таа бројка да се зголеми.
Стејт департментот има девет центри за проверка на бегалци во светот. Таму вработени од Министерството за внатрешна безбедност проценуваат кои бегалци може да бидат примени во САД.
