Македонија,Политика

Ставрески: За самовработување до 23.000 евра

Ставрески: За самовработување до 23.000 евра

Вработување на младите лица е главна цел на програмата на ВМРО-ДПМНЕ за следните четири години и во таа насока се предвидени повеќе добри проекти, изјави денеска Зоран Ставрески, носител на кандидатската листа за пратеници од ВМРО-ДПМНЕ во четвртата изборна единица, пренесува МИА.

„Секој млад човек кој сака да се самовработи може да добие 7.000 евра за сопствено вработување, а може да вработи уште четири лица во истата фирма кои ќе добијат по 4.000 евра. Значи вкупно 23.000 евра е финансиската поддршка што е предвидена за самовработување и средствата се даваат на вкупно седум години од кои една и пол година е грејс-период и пет и пол години рок на враќање“, истакна Ставрески.

Втората мерка, како што поосчи, е плаќањето на придонесите за младите лица и персоналниот данок. Доколку бидат вработени од страна на работодавач, Владата ќе ги плати придонесите за здравствено, пензиското и социјално осигурување за 12 месеци, а работодавачот ќе биде ослободен од персонален данок. За сметка на тоа работодавачот се обврзува да ги здржи на работа уште дополнителни 12 месеци, а може и повеќе.

„Со вакви мерки, како и со отворањето на работни места во слободните и индустриските зони новите фабрики што ги очекуваме во следниот период, очекувањата се дека драстично ќе се намали невработеноста кај младите лица, односно ќе се отворат многу нови можности за вработување на младите“, посочи Ставрески.