Искрено сакаме односите меѓу Македонија и Руската Федерација да се унапредуваат успешно, конструктивно, во духот на соработката, заемното разбирање и рамноправност. Русија се обидува да биде добар партнер, а како ќе се однесува Македонија, тоа е нејзино суверено право, изјави во вторникот амбасадорот на Руската Федерација во Македонија, Олег Шчербак, при неговата посета на Прилеп, запрашан да ги оцени моменталните односи меѓу двете земји.
„Русија и Македонија се две пријателски држави кои се поврзани со вековни историски и духовни врски. Во голем дел имаме заедничка култура, во голем дел и заеднички јазик, заеднички духовни корени. Искрено сакаме односите меѓу Македонија и Руската Федерација да се унапредуваат успешно, конструктивно, во духот на соработката, заемното разбирање и рамноправност. Во меѓународните односи многу се битни билатералните односи, а тоа е како улица со двонасочно движење. Како и за добро танго, потребни се напорите на двајца. Русија се обидува да биде добар партнер, а како ќе се однесува Македонија, тоа е нејзино суверено право“, рече Шчербик.
Амбасадорот Шчербак ги отфрли како пропагандни лаги обвинувањата дека Русија се меша во дел од земјите на Балканот за да не влезат во НАТО како и во спорот за името меѓу Македонија и Грција.
„Во современиот свет се произведуваат многу лаги. Тоа е класичен пример на пропагандни лаги. Немам намера да отворам вистина за овие лаги, а на сите овие прашања одговорив минатата сабота во напис во весник“, рече Шчербак.
Што се однесува до тоа дали светот е на работ на нова Студена војна, Шчербак рече дека тоа не е на иницијатива на Русија.
„Русија прави сѐ да го намали нивото на тензичноста во светот и дејствува да ја запре таа страшна антируска пропаганда која се шири во светот. Правиме сѐ овие обиди да се започне студена војна да згаснат и да не преминат во ‘жешка’ војна“, рече амбасадорот на Руската Федерација при денешното одбележување во Прилеп на 9 мај – Денот на победата над фашизмот.
