Македонија најверојатно ќе ја изгуби препораката од Европската комисија, поради бокјкотот на Парламентот од страна на СДСМ, Според информациите кои вчера ги објави скопската телевизија „Алфа“.
Денеска, пак, на прес-конференција, Лидија Димова, претседателка на комисијата на СДСМ за евроинтеграции, ја обвини власта дека таа е виновна за евентуалното губење на препораката и ја стави на тапет. Ниту еднаш Лидија Димова не спомена дека бојкотот на парламентот од страна на СДСМ е главната причина за тоа.
На новинарско прашање дали смета дека ако Македонија ја изгуби препораката, тоа ќе биде шлаканица за власта, Лидија Димова одговори:
– За жал шлаканицата нема да биде за власта, туку за сите граѓани на Македонија и тоа ќе биде најмалата трагедија што власта ќе биде таа која ќе биде ставена на тапет, рече Димова.
Инаку, вчера, телевизијата „Алфа“ повикувајќи се на дипломатски извори објави дека Македонија ќе остане без препораката за отпочнување на преговори со Европската унија и дека се води голема битка во рамките на комисијата, уште во нацрт-извештајот што во моментов се подготвува, да биде целосно повлечена препораката, која инаку Македонија ја добива пет години по ред.
– Причина, според дипломатите, сега не е само спорот со името и притисокот од Грција, туку тоа е цехот што ќе треба да го плати државата поради бојкот на опозицијата на Парламентот и целосното отсуство на политички дијалог.
Ако оваа најава се оствари, и препораката навистина биде повлечена и во официјалниот извештај што треба да биде објавен на 8 октомври тоа ќе биде сериозен удар врз угледот на Македонија, не само во рамките на Европската Унија, туку и пошироко. Може да има сериозни последици врз сите процеси во државата, пред се врз економијата.
Потребата од партиципација на опозицијата во процесите во државата, првенствено во работата на Парламентот, е многу поважна од било која реформа во судството или во образованието.
Западните дипломати веќе подолго време ги искажуваат своите критики за одлуката на СДСМ за бојкот и во неколку наврати апелираа тие да се вратат и да започнат дијалог со власта, но очигледно засега никој не ги сфати сериозно овие пораки. Во моментов, политичкиот дијалог меѓу власта и опозицијата е целосно блокиран.
ВМРО-ДПМНЕ во неколку наврати ја повика СДСМ на разговори, но добива само негативен одговор. СДСМ прифаќа разговори само за техничка влада, нешто што дури наиде на критика и кај западните земји. Се очекува кон крајот на октомври, оставките на пратениците од оваа партија да бидат конечно констатирани, беше објавено од телевизијата „Алфа“.