Од декември оваа година најголем дел од услугите што ги даваат државните институции граѓаните ќе можат да ги добиваат на еден шалтер, најави денеска министерот за информатичко општество и администрација Иво Ивановски на прес-конференција на која информираше за напредувањето на проектот за модернизација, проширување и адаптација на Системот за интероперабилност, објави МИА.
– Веќе целата хардвер опрема е пристигната, а Владата на изминатата седница ги одобри следните дваесет услуги што институциите ќе ги добијат по електронски пат со што граѓаните нема да имаат потреба да одат од шалтер на шалтер од институција до институција, рече Ивановски, кој денеска беше во посета на Управата за водење матични книги.
Оваа институција, посочи тој, е една од најкористените во однос на барањето податоци од страна на институциите и граѓаните. Во просек се издаваат по 350.000 документи годишно во целата држава.
– Во декември оваа година кога ќе се поврзат сите институции, а тоа се 15 нови институции и претходните четири, со кои го започнавме првиот проект, тоа се вкупно 19 институции, и со овие дополнителни дваесет услуги, граѓаните ќе можат 99 отсто од услугите што ги добиваат од државните институции да ги добиваат на еден шалтер, изјави Ивановски.
Граѓаните, во институциите што се дел од овој проект, на еден шалтер ќе можат да ги добијат сите потребни документи по електронски пат. Дел од овој проект се Агенцијата за вработување, Фондот за пензиско и инвалидско осигурување, ФЗОМ, Основен суд – 2, Управен суд, Агенција за катастар, Министерството за земјоделство, шумарство и водостопанство и други.
Ивановски најави дека еден од следните проекти на Министерството ќе биде надградба на дополнителните услуги. – Граѓаните да можат истите услуги да ги добијат по електронски пат од кој било компјутер во светот, рече министерот за информатичко општество и администрација.
Оние граѓани кои ќе сакаат да поднесат електронско барање ќе мора да имаат електронски потпис.
– Според Законот кој што е на сила во Македонија, секој граѓанин кој за да добие официјални документи од државните институции мора да поседуваат електронски потпис. И исто ќе биде и за овие услуги и за сите наредни услуги што ги планираме, појасни Ивановски.
Директорот на Управата за водење матични книги Силас Муслиоски информираше дека во завршна фаза е воведување електронски матичен регистар.
– Со целосното имплементирање на електронскиот матичен регистар би се овозможил слободен пристап на сите граѓани на државата кои на многу полесен и поедноставен начин ќе можат да ги извадат документите од Управата, а тоа се изводите од матичните книги на родени, венчани и умрени. Граѓаните нема да мораат барањата да ги предаваат во градот каде што се родени, туку ќе можат да ги поднесуваат без разлика во кој град или населено место се наоѓаат, а каде што има електронско водење на матичните книги, изјави Муслиоски.
Со вака поднесеното барање, објаснува тој, документите ќе можат да се подигаат за час до час и половина и ќе му биде издаден електронски.
– Ова би значело големо олеснување за граѓаните во однос на финансиските трошоци. Тие не би морале да патуваат од местото на живеење до местото каде што се родени, рече Муслиоски.
Во врска со проектот за интероперабилност, директорот на Управата посочува, дека претежно сите институции црпат информации од кај нив бидејќи тука се водат податоците за родени, венчани и умрени, што значи извор за секој граѓанин на оваа држава.
– И со проектот интероперабилност ќе биде поефикасно работењето на самата Управа, како и на другите институции кои се поврзани со нас, рече Муслиоски. е