Македонија

Селата во охридско, струшко и ресенско добија струја

ЕВН Македонија ја санира дистрибутивната мрежа оштетена од снежните наноси и силниот ветер. Во лоши услови екипите на ЕВН Македонија работат на санирање на поголем број дефекти настанати од интензивните снежни врнежи и силниот ветер, по што состојбата со електро снабдувањето во кризните региони полека се нормализира.

Како што соопшти ЕВН Македонија, синоќа поголем дел од отсечените села во струшкиот, охридскиот и ресенскиот регион добија електрична енергија.

Нормализирано е снабдувањето во преспанските населени места Козјак, Горна и Долна Бела Црква, Езерани и колекторот во Езерани, Љубојно, Долно Дупени, Лева Река, Крушје.

Во охридскиот регион електрична енергија добија Долно и Горно Лакочереј, Климештани, дел од Мешеишта и Требеништа, а сите дефекти на 10 кВ далекувод кај Велестово и Крушје се отстранети и се очекува утринава да биде нормализирано снабдувањето.

Во струшкиот регион нормализирано е снабдувањето во Горно и Долно Татеши, Љубаништа, Октиси и Боровец. Во Делогожда и Радожда екипите на ЕВН и жителите на овие села заеднички се пробиваат до завеаните столбови и се работи до доцните ноќни часови.

Во струшкиот регион од синоќа под напон се Калишта, Франгово, Радолишта, Феришта, Дреслаица, Мороишта, Ложани, Ливади, Биџево, Вевчани и Велешта.

Од ЕВН Македонија соопштија дека од синоќа и Трафостаницата Центар Жупа од вечерва е под напон. Пуштени се 10 Кв изводи кон трафостаниците во селата во Центар Жупа. Над 95 проценти од населените места во овој крај добија електрична енергија.

Благодарение на екипата со моторизирани санки на МВР, се посочува, времето на стигнување на електромонтерите до местото на дефектите значително се намали.

Само во струшкиот регион паднати и искршени се 60 столба на 35 кВ далекувод и над 100 на 10 кВ далекуводи.

– Белата снежна мрежа проследена со тежок снег и силен ветер кој во планинскиот дел дувал со брзина од над 100 км на час буквално ги замрзнал столбовите, а потоа ги кршел и откорнувал од лежиштата, се појаснува во соопштението.

Критични точки во снабдувањето се уште има во дебарскиот регион и екипите на ЕВН Македонија интензивно работат на отстранување на дефектите.

Во струшкиот регион на потегот околу Луково и Јабланица столбовите се тешко пристапни и екипите на ЕВН тешко се пробиваат до нив, но, и синоќа и денеска ќе се работи на тоа да се нормализира снабдувањето.

Најкритични се селата во дебарскиот регион во Реканскиот крај на потегот од Жировница до Бошков мост, каде комплетно е уништена дистрибутивната мрежа и 35 кВ и 10 кВ далекувод. На овој потег се прави една нова врска, за само еден ден се подигна сосема нов далекувод од 12 столба, но двата затегнувачки столба кои ја прават врската преку Дебарско езеро се урнати од ветрот и снегот и заедно со проводникот се во езерото. Во текот на денешниот ден со специјализирани екипи и чамци ќе се постават два нови столба и ќе се премостува врската низ езерото.