Контроверзниот тренер на Атлетико Мадрид, Диего Симеоне уште еднаш покажа е непремостлива пречка за Барселона, дека има лек за популарната “тика-така” и дека има измислено совршена тактика со која се лимитира играта на најкреативните фудбалери во дресот на Барса, Лионел Меси, Чави Хернандез и Андрес Иниеста.
Аргентинскиот стручњак по натпреварот откри дека клучот за историскиот успех лежи во високиот пресинг и во напорната работа во сите 90 минути.
“Не можам да ви опишам колку сме среќни, елиминиравме еден голем тим каков што е Барселона. Има доволно време за да се рехабилитираме од овој тежок натпревар и да се подготвиме за следниот првенствен дуел. Свесно и дозволивме на Барселона да доминира на средината, да има контрола врз топката. Мислам дека не очекуваа толку висок пресинг. Тука лежи клучот на овој историски успех. Работевме напорно во сите 90 минути, се боревме за секоја изгубена топка. Чави и Иниеста немаа време за размислување, веднаш ги напаѓавме. Моите фудбалери се многу среќни, свесни се дека победија еден голем противник”, изјави предводникот на “јорганџиите”.
