Македонија

Следната година ќе биде готов новиот објект на Струмичкиот театар

Следната година ќе биде готов новиот објект на Струмичкиот театар

Во моментов интензивно се работи на изградбата на новиот објект на Струмичкиот театар и истиот ќе биде готов во првата половина од наредната година.

За ова информира министерката за култура Елизабета Канческа-Милевска која денеска беше во работна посета на Општина Струмица. Таа изврши увид во изградбата на театарот и во реновирањето на фасадите во старата чаршија, како и во реализацијата на проектите на националните установи од културата.

Интензивно се работи на реконструкција на театарот. На почетокот на април бев во посета и денес може да се види дека е забрзана динамиката на изградбата. Веќе се чувствува театарската сцена, просторите, гримиорните, другите простори за техничка служба,  салата, сценската кула. Ме радува што забрзано се работи. Овој објект е од големо значење на Струмица. Голем дел од орнаментиката ќе се врати на старото место. Оригиналната врата, која сега се наоѓа во Центарот за култура, ќе биде повторно поставена, рече Канческа- Милевска.

Министерката е задоволна и од реновирњето на фасадите во старата струмичка чаршија. Тие треба да бидат готови до крајот на месецов.

-Покрај фасадата на архивската зграда која е целосно готова, се пристапи и кон обнова на фасади во старата чаршија во Струмица. Верувам дека е од огромна важност за струмичани овие објекти да го добијат автентичниот изглед и да им се врати археолошкиот сјај. Изработени се двата проекта, интензивно се работи на првите два објекта кои до крајот на јули ќе бидат готови. Потоа ќе се пристапи кон обнова на фасадите и во другите објекти во старата чаршија. Многу ни значи и позитивната реакција на граѓаните, но и на трговците кои работат тука. Со овој проект продолжуваме. Покрај старата чаршија, имаме опфатено и други објекти кои се споменици на културата, истакна Канческа- Милевска.

Во рамки на проектот на Министерството за култура за обнова на музејските поставки, во Струмица ќе има нова која ќе биде отворена во декември и ќе содржи три дела – историја, археологија и етнологија.

Во музејските поставки се презентираат голем број нови наоди најдени на археолошките капацитети. Се надевам дека ќе има и едукативен карактер. Ќе има посети од ученици, граѓани, туристи, сите да се запознаат со она што го поседуваме како културно богатство. Во Струмица еден дел е завршен. Ги видовме и новите витрини кои се набавени. Поставката ќе опфати историја, археологија и етнологија. Ќе има и сувенирница, на горниот посебен дел ќе има едукативно катче, појасни Канческа-Милевска и додаде дека Министерството заедно со музеите работи и на обнова на музејските депоа.

Нагласи дека помагањето на локалните културни настани е врвен приоритет на Министерството кое ќе продолжи да ги поддржува проектите на Центарот за култура „Антон Панов“, на театарскиот  фестивал „Ристо Шишков“ и филмскиот „Астерфест“, како и на бројни други културни настани. Во оваа пригода таа му ја честиташе наградата Национален уметник на струмичкиот поет Никола Маџиров, која ќе му биде врачена на Денот на независноста – 8 Септември.