Балкан

Словенечки лекар обвинет за евтаназија на седум пациенти

Словенечки лекар обвинет за евтаназија на седум пациенти

Словенечкиот лекар, кој на почетокот на годината беше осомничен за евтаназија на пациент пред умирање, по што е отворена полициска истрага, е уапсен и осомничен за повеќе кривични дела, меѓу кои и седум убиства, пишуваат словенечките медиуми.

Полицијата потврди дека е поднесена кривична пријава за повеќе од 20 кривични дела против животот и телото, човечкото здравје и човековите права, како и постапки со кои се прекршува службената должност и јавните овластувања.

Поранешниот лекар на невролошката клиника на Клиничкиот центар во Љубљана, Иван Радан, кој од јануари е под истрага дека повеќе години извршувал недозволена евтаназија со давање на тешко болните пациенти инфузија со мешавина од морфиум и калиум, по што беше отпуштен, во понеделникот е уапсен, пишува љубљанскиот весник „Дневник”.

Весникот наведува дека уапсениот лекар на своите пациенти без оправдување им препишувал големи количини психоактивни лекови, од кои наводно и самиот бил зависник, како и дека со истрагата во неговиот компјутер се откриени повеќе фотографии на евтанизирани пациенти, што исто така е противзаконско.

По откривањето на аферата во јануари Радан е отпуштен од работа, а постапка против него е покрената и од лекарската комора, за работење спротивно на лекарската етика.