Македонија – Словенија е осминафинналиот пар на светското ракометно првенство во Катар. Натпреварот се игра во 16.30 часот утре, а до тогаш од двата табора ќе се води психолошка „војна“ преку медиумите.
Влогот е голем, пласман во четвртфиналето на мундијалот и отворени порти кон квалификациите за Олимписките Игри во Рио де Жанеиро.
Словенечкиот селектор Борис Денич воопшто не е радосен дека треба да игра против Македонија. Тој за медиумите од таа земја изјави дека натпреварот ќе биде пеколен во текот на сите 60 минути.
– Ние Балканците знаеме да кажеме…Блазе си им на тие што предвреме се радуваат. Сигурно им е убаво, ама послатка е радоста после победата. Немаме некои емоции, сега сме максимално фокусирани на мечот што ни претстои, а Македонија е квалитетна селекција, но верувам дека можеме да ја победиме – изјави Борис Денич за словенечките медиуми.
Тој се осврна и на настапот на Ренато Вугринец, кој сега ќе биде од македонска страна.
– Вуги е мојот репрезентативен цимер. Сигурно нему ќе му биде најтешко. Тој е сеедно наш човек, како и да го завртите листот. Одлучи да игра за Македонија и нема да ми падне тешко, доколку одигра добро за нив на утрешниот меч. Секако, ако добие шанса за тоа – дополни Денич.