Балкан

Сноуден преку телеконфереција се обрати на форум во Атина

Сноуден преку телеконфереција се обрати на форум во Атина

Едвард Сноуден, кој денеска преку телеконференциска врска говореше на Форумот за демократија во Атина, покрена дилема за границата меѓу безбедноста и заштитата на приватноста.

Поранешниот техничар и администратор на системите на ЦИА и НСА, потврди дека побарал да биде помилуван од претседателот на САД, Обама, пред да ја напушти функцијата, бидејќи според него, и поддржувачите на #pardonsnowden кампањата, информациите за кои е обвинет дека ги објави, не предизвикаа непоправлива штета на тајните служби, а граѓаните имаа корист.

Сноуден тврди дека протекувањето на разузнавачките информации придонесуваат или придонеле за создавање на подобри механизми за заштита и развој на технологии за безбедноста на интернет и на електронските апарати, што исто така ќе го спречи укинувањето на приватноста.

Осврнувајќи се на приватноста, тој рече дека таа се преведува во неколку работи, како што е на пример да се има отворен ум. Според него, приватноста е поважна од слободата на говорот, затоа што второт бара заштитна мрежа.

– Основната идеја на патриотизмот не е да се каже „да“ и да се согласуваш со се. Несогласувањето е она што најмногу ни треба. Потребна е критичка анализа, како и да се преразгледаат прашањата поврзани со демократијата, изјави Сноуден, упатувајќи на Фондацијата Слобода на печатот која бара нови алатки за новинарите со цел да се обезбеди слобода на печатот.

Сноуден, кој е во егзил во Москва, на атинскиот форум рече и дека планира да гласа на претседателските избори во САД, но не откри за кого.

– Јас ќе се гласам. Но, како застапник на приватноста сметам дека е важно еден поединец никогаш да нема обврска да дискутира за својот глас. И јас нема да го правам тоа со мојот глас, рече тој.