Собранието на Република Македонија денеска ја продолжи конститутивната седница за избор на претседател, заменик на претседателот, членови и нивни заменици на Комисијата за прашања на изборите и именувањата. На дневен ред на седницата е и изборот на претседател на Собранието на Република Македонија.
Пратениците од ВМРО-ДПМНЕ вчера во своите излагања бараа да се почитува волјата на мнозинството при изборот на претседател на Комисијата и на Собранието кои, како што посочија, секогаш доаѓаат од победничката пратеничка група.
На седницата која започна вчера за збор се пријавија 57 говорници.
И на денешната седница гости се претставници на дипломатскиот кор кои ќе ја следат седницата од галеријата на собраниската сала.
Вчера СДСМ поднесе иницијатива за избор на претседател на Собранието преку потписи на 20 пратеници.
Во однос на составот на Комисијата за прашања на изборите и именувањата, според претходно договореното од политичките партии, ВМРО-ДПМНЕ ќе има шест члена, СДСМ пет, а ДУИ и БЕСА по еден член.
Утврдувањето на предлогот за состав на Комисијата за прашања на изборите и именувањата е предуслов за продолжение на конститутивната собраниска седница која почна на 30 декември 2016 година, но беше прекината бидејќи не беше обезбедено парламентарно мнозинство за избор на претседател на Законодавниот дом.