Македонија

Собранието не ги изгласа измените на Законот за минимална плата

Собранието не ги изгласа измените на Законот за минимална плата

Во рамки на продолжението на 67. седница Собранието на Република Македонија не го изгласа Предлог законот за изменување на Законот за минимална плата, предложен од пратениците од опозијата.

Пратеничката група од опозицијата предлага зголемување на минималната плата на 11.000 денари, додека владејачкото мнозинство смета дека овој, како и другите предложени закони од опозициските пратеници, се во контекст на претстојните избори и чист популизам.

И денеска како и вчера пратениците од обата табора упатија меѓусебни обвинувања.

Пратениците од ВМРО-ДПМНЕ, меѓу другото, прашаа зошто СДСМ не донесе закон за минимална плата додека беше на власт и зошто беа затворени бројни фабрики и на улица беа оставени 200.000 работници. Владата на ВМРО-ДПМНЕ првпат донесе закон за минимална плата.

Опозициските пратеници сметаат дека минимална плата од 9.590 денари не е реална и не соодветствува со потребите на граѓаните.

Седницата ќе продолжи по попладневната пауза со претпоследната точка од дневниот ред на 67. седница Предлог законот за изменување на Законот за Буџетите, во прво читање, исто така предложен од пратениците од опозицијата.