Собранието попладнево во рамки на 67. седница расправаше за Предлог-законoт за измени на Законот за основно образование, поднесен од пратеничката група на опозициската СДСМ, која со него бара укинување на екстерното тестирање.
Рената Десковска од СДСМ образложи дека бараат укинување затоа што тоа, како што рече, не го мери знаењето на учениците, а наставниците ги става во нееднаква положба.
– Екестерното тестирање не го мери знаењето на учениците. Концептот не е воведен со намера да се ослободат наставниците од притисок да ставаат високи оценки, туку напротив е воведен со цел да се стават под притисок на власта. Целта на екстерното тестирање е да се одземе сигурноста на работното место на наставниците, да се држат во постојана зависност и несигурност, истакна Десковска и додаде дека екстерното тестирање содржи бројни технички слабости и не придонесува за подобрување на квалитетот на образованиоето.
Таа ги повика пратениците од владејачкото мнозинство да се соочат, како што рече, со грешката што ја направиле со воведување на екстерното и да ја исправат.
Промени во екстерното тестирање со сеопфатна анализа побара пратеникот Павле Трајанов од Демократскиот сојуз, според кого е потребно тестирање како што се применува во други држави.
Според Драган Данев од ВМРО-ДПМНЕ, има голема разлика во владеењето на ВМРО-ДПМНЕ и СДСМ во однос на статусот на наставниците и посочи дека од 2006 година наставниците добиле решенија за работа, додека во времето на СДСМ тие биле под договор на определено време.
Неговиот сопартиец Андон Чибишев посочи дека знаењето на ученикот не се мери само со екстерното тестирање и напомена дека доколку СДСМ побара, тие ќе прифатат расправа за некои промени во тестирањето. И Владанка Авировиќ од СПМ рече дека се согласува со измени во проектот, но не и негово укинување.
Расправата по оваа точка од дневниот ред ќе продолжи утре во 11 часот.
