Балкан

Соран Гриндеану нов кандидат за романски премиер

Соран Гриндеану нов кандидат за романски премиер

Романската Социјадемократска партија (ПСД), која победи на неодамнешните парламентарни избори во Романија, реши да го предложи 43-годишниот Сорин Гриндеану за нов кандидат за премиер, откако претседателот Клаус Јоханис во втроникот го одби нејзиниот првичен предлог мандатар за состав на новата влада да биде Севил Шајде.

– Решивме да не ја втурнеме земјата во нова политичка криза и затоа избравме нов кандидат за премиер, изјави синоќа лидерот на ПСД, Ливиу Драгнеа, по седницата на највисокото партиско раководство.

Новиот кандидат за мандатар за состав на новата романска влада Гриндеану е поранешен министер за комуникации на Романија.

Романскиот претседател Јоханис во вторникот го одби првичниот предлогот на ПСД за мандатар, со образложение дека „внимателно ги проценил аргументите за и против и решил да не ја именува Севил Шајде“ за предложената функција.

Тој притоа ја повика ПСД и нејзиниот коалициски партнер, Алијансата на либералите и демократите (АЛДЕ) да достават нов предлог за иден премиер.

ПСД и АЛДЕ заедно имаат 250 пратеници во 465-члениот долен дом на романскиот Парламент, што им обезбедува стабилно парламентарно мнозинство.

Доколку беше избрана за претседател на Владата, Шајде ќе беше првата жена премиер на Романија и прв припадник на муслиманската заедница во земјата што би ја извршувал премиерската функција.