Сопругата на Претседателот на Република Македонија Маја Иванова и австриската амбасадорка во Македонија Ренате Коблер денеска ги посетија децата од СОС Детското село, по повод 15-годишнина од основањето на организацијата.
Децата од СОС Детското село пред присутните се претставија со рецитал и претстава.
Главната манифестација по повод јубилејот на СОС Детско село Македонија ќе се одржи на 30 ноември под покровителство на госпоѓа Иванова и Амбасадата на Австрија.
Сопругата на Претседателот Маја Иванова, изрази задоволство што е дел од СОС Детското село и што има чест да биде покровител на манифестацијата.
– Ви посакувам многу здравје, среќа, радост и убавини. Да бидете добри ученици и да ви се остварат сите желби. Да станете одлични спортисти, добри глумци и глумици, да бидете аналитичари, правници, доктори и се она што ви посакува срцето, рече Иванова.
Таа ги поздрави децата од семејството Иванов и изрази голема почит кон СОС мајките кои, како што рече даваат несебична грижа и љубов на децата за тие да израснат во подготвени и лојални граѓани на нашата држава.
Амбасадорката на Австрија Ренате Коблер, рече дека Австријците од мали растат со концептот СОС Детско село и идејата и замислата на мојот сонародник Херман Гмајнер.
– Сметам дека Гмајнер многу би се радувал што неговата идеја и понатаму се развива и во иднина ќе постои. Ви ја честитам 15-годишнината. До мене многу допира тоа што гледам дека голем број на луѓе го изодуваат овој пат, што не е вообичаен, рече Коблер.
Националиот директор на СОС Детско село Македонија Јулијана Гапо, рече зачетоците почнуваат во 2001 година кога во Македонија е отворено првото СОС Детско село.
– Организацијата по 15 години го смени својот лик и денеска има многу програми и презема акции во заедницата кои подразбираат поддршка и згрижување на деца без родители и родителска грижа. Досега во СОС Детско село над 100 деца се згрижени. Во моментот имаме околу 25 млади луѓе, кои дел се студенти, дел се вработени и некои бараат вработување, рече Гапо.
Порача дека остануваат посветени да работат и помагаат, дека нивната цел е ниту едно дете да не расте без семејство и без дом, и се додека и последното дете има поддршка од нивната работа ќе продолжат.