Свет

Спречен бомбашки напад во Мелбурн

Спречен бомбашки напад во Мелбурн

Полицијата во австралискиот град Мелбурн уапси 17-годишно момче, обвинето дека се подготвувало да активира три рачно изработени бомби, соопштија американските медиуми.

Тинејџерот е уапсен вчера попладне во антитерористичка акција во неговиот дом во предградието Гринвејл, каде биле најдени и деактивирани експлозивните направи, изјави заменик комесарот на федералната полиција Мајк Фелон.

За полицијата е доста збунувачки да види како толку млади луѓе се отуѓуваат од општеството до тој степен што се подготвени да им се заканат на животите на многу Австралијци, рече Фелон пред новинарите.

Осомничениот во понеделник ќе се појави пред судот за малолетници во Мелбурн под обвинение за тероризам.

Австралискиот премиер Тони Абот ги повика сонародниците да го продолжат животот со нормално темпо, „затоа што целата идеја на тероризмот е да не натера да стравуваме и да не бидеме нормални“.

Според непотврдени информации, таткото на момчето е лекар од сириско потекло. Семејството не знаело дека експлозивите се скриени во нивната двокатна куќа.

Заменик комесарот на полицијата во државата Викторија, семејството на осомничениот го опиша како „грижливо и сакано“. Според него, роднините на тинејџерот биле многу збунети кога ја дознале веста за апсењето и плановите на момчето.